Lo Collectif Prouvènço au cèu e lei Calandretas a l’infèrn

Lo projèct d’Observatòri de la Lenga Provençala que pòrta lo Collectif Prouvènço, dins una anciana bastida (Mas Sant Pau) en renovacion de Chivau Blanc (Vauclusa) es ara ben sus la draia. Divèndres 16 de decembre lo Consèu Regionau, en assemblada pleniera, a acordat 496 000 € a la Comuna, « en partenariat amé l’associacion Collectif Prouvènço ». Lo projèct « s’inserís dins lo dispositiu « Luecs de conservacion dei tradicions regionalas » e sa subvencion serà imputada au quadre d’intervencion de la politica culturala regionala.
 
Aqueu Projèct « resolument mistralenc » segon sei documents de propaganda, se vòu una mena de consèu oficiau de collectivitats en Provença. Ansin se ditz « instància representativa au sen dau Consèu Regionau e dau Pargue Naturau Regionau dau Leberon ».
 
A l’ora d’ara son baile, lo Collectif Prouvènço, a chausit un arquitècte, Yoann Hody (Arles), lançat una demanda d’ajuda a la Fondacion dau Patrimòni, qu’a ja recebut 10 000 € d’intencions de pagar, e chifrat un biais de bailejar l’afaire.

Serà mestrejat per un Consèu d’Administracion, a majoritat collectivista, amé d’aliats, un de gestion, enfin am’un Comitat d’Expèrts, qu’aqueu serà solament consultatiu.
 
La governança d’aquel Observatòri seriá mestrejada per una soleta associacion. Es ce qu’agrada pas a Arvei Guerrera. Conselhier regionau (EELV-POC) fin qu'en 2015, aviá agut un agach sus lo projèct d’un grop déjà ben en cort dins l’entoratgi de Miquèu Vauzelle, dins la mandatura 2010-2015. « Coneissi lo projèct, e s’a pas poscut avançar jusqu’ara, èra perqué es pas possible de confiar a un solet grop associatiu un projèct d’aquela amplor : es subvencionable a autor de 880 000 €, valent a dire que costarà aperaquí 1,5 M€ e que sabem que son fonccionament costarà chasque an aperaquí 15% d’aquela soma. Sola una gestion collegiala seriá recomendabla ». Per l’ancian elegit, la decision regionala de divèndres se pagarà sus l’esquina deis autreis aparaires e de sei projècts.

Divèndres au Consèu Regionau, l’afaire siguèt decidit après « 1’31’ de presentacion » coma va sotalinhava lo president Crestian Estrosi.

Mai am’una question dins l’assemblada. Un conseilhier FN de Castèureinard, Joan-Alexandre Mousset, ne’n a profiechat per demandar perqué dins lo mume temps que siguèt donat 496 k€ a una associacion, la Region amputava la subvencion de fonccionament de la Federacion dei Calandretas.
 
Aquela a vist passar l’ajuda regionala de 75 000 € a 40 000€, maugrat que regarda doas cent familhas e de professionaus. Un conselhier dau president se plega, alòr que mossur Mousset charra, per parlar a l’aurelha de Crestian Estrosi, que respondrà quatecant : « l’associacion que ne’n es aquí question reconèis pas la pluralitat dei lengas regionalas ; s’inscriu adonc pas dins la politica de defensa de l’identitat e dei tradicions de la cultura, e de la pluralitat de l’eiretatge culturau, comprés dins lo domèni linguistic vòugut per nòstre executiu. Vaquí perqué l’acompanharem pas coma aperavans ».
 
Bernat Vaton, lo president de la Federacion Provençala dei Calandretas ne’n resta estabosit. « De tota evidéncia, lo president de Region es la victima d’una desinformacion. Lo convidam a visitar nòstrei doas escòlas en Provença : entendrà ben qu’a Aurenja s’ensenha lo provençau rodanenc, e a Gap lo vivarò-aupenc, o occitan aupenc, o encara, coma volètz, lo gavòt. »
 
Lo responsable associatiu sotalinha que fuguèt sollicitat per l’elegit dau FN, per informacion, a l’escasença d’una comemoracion publica. 

La politica d’ajudas publicas dau Consèu Regionau Provença Aups Còsta d’Azur sembla ben a l’ora d’ara privilegiar lo Collectif Prouvènço. Au prejudici d'autreis actors? Es de vèire dins lei mes que venon.

En febrier 2017, la Conferéncia deis Arts e de la Cultura, l’organisme que s’es donat Crestian Estrosi per bailejar la politica culturala, acamparà d’associatius amé d’artistes, per parlar concretament « projècts ». S’aquelei pòdon encara trobar d’argent public per èstre endraiats, o perseguits.