L’Institut d’Estudis Occitans das Aups d'Auta Provença a comunicat son programa per 2020, dau temps d'una reünien d’evaluacien de la politica dau CD 04 a Dinha lo 20 de novembre.
L’occitanisme culturau lança un projècte en acòrdi amb tres escòras de Dinha e L'Escara. La chantaira Liza va trabalhar amb los escorans sus una creacien de chançon en provençau en febrier de 2020 e un concèrt de restitucien serà donat l'8 de febrier. Esperem vos comunicar lo detalh quora la data serà pausaia.
Autre periòd important das manifestaciens culturalas occitanas, caramentrant. Parier l’IEO trabalha en relacien amb los ensenhants dau departament, e amb l’Associacien per l’Ensenhament de la Lenga d'òc (Aeloc). Lo caramentrant escolar serà adobat dins nòu escòras, distribuaias dins tot aquest grand territòri. Lo Trio Petasson li participarà en musica, e un après-miègjorn caramentrant serà consacrat a chascuna das escòras...un pauc tardi dins la sason, corrent de mars, o abriu.
L’IEO considèra que, per lo biais das tradiciens culturalas popularas, es possible de crear un climat de benvelhança devèrs la lenga occitana aquí. Los parents d’escorans coma los elegits locaus son dau bòn lo public visat.
Viraia teatrala en òc
L’IEO 04-05 agirà tanben en relacien amb l’Associacien Escolara Occitana (ASOC), que prepara la viraia locala de teatre escolar per mars-abriu de 2020, la “Virada”. Lo Teatre de la Rampa (Montpellier) deuriá presentar la pèça Istòrias per onze representaciens.
L’IEO sembla urós de sa collaboracien amb lo Conselh Departamentau, tant per sa politica, qualificaia de coërenta, coma per son ajua dirècta as projèctes dau monde associatiu de promocien de la lenga nòstra.
A notar que cinc escorans professors das escòras an chausit aquest an de seguir un cursus de lenga e cultura d'òc a l’ESPE das Aups d'Auta Provença. Futurs mestres obrant per lo retorn dau provençau dins las escòras dau departament de Paul Arène e Lazarine de Manòsca?