France 3 mantèn seis emissions en lenga nòstra dau tèmps de l’acantonament. Au còntre d’autreis emissions dins l’espaci de la lenga d’òc, segon son baile Frederic Soulié.
Mai en rason de la dificultat de rodar au defòra, lei còlas demoran acantonadas e es amb’una seleccion d’archius que lo monde pòu aprofiechar d’emissions en provençau, niçard o aupenc d’òc.
“Per aquò ai triar d’emissions difusidas en 2019 e sensa rapòrt vertadier amé l’actualitat” nos explica Frederic Soulié. Marcha com’aquò despuei lo 22 de març.
L’emission “Vaqui ” se pòu mirar totei lei dimenges a 10h45 e per una miegora. Per un còp, aquòs segur, la deprogramaràn pas per passar una partida de tennis de Roland Garros, o lo Torn de França, coma se’n èra acostumada la television regionala.
Dimenge venènt lo 3 de mai lei telespectators auràn amb aquò de subjècts sus la Fèsta dei Sciéncias, en particulier un reportatge au Naturoptèra de Serinhan dau Comtat, pròche de l’Harmas, l’ostau-òubservartòri de Joan-Enric Fabre, l’entomologista felibre iper-conéissut. Per faire visitar lei luecs France 3 a demandat lo professor d’occitan-provençau Simon Calamel.
Tanben a Anòt, la jornalista Magali Gazzano vos menarà a admirar lo cèu lo mai pur d’Euròpa, alòr que Liza rescontra un vinhairon afogat de mecanica dins la Vauclusa.