Mai qu’una apli facha per destriar lei parlars francés d’aquí e d’ailà « français de nos régions » es un biais de portar pèire a la recerca sus lei biais de dire d’entre Québec e Soissa o d’autrei luecs onte un francés regionau se parla.
L’aplicacion es de crowdsourcing o produccion participativa, segon un principe ben adaptat ais aplis per smarfònes, e es facha per de linguistas, en particular Mathieu Avanzi, de l’Universitat de Neûchatel, en Soissa. Adonc li es possible premier de respondre an una tiera de question per saupre quau siás, e vòstrei praticas dau francés.
Am’aquò vos demandan de causetas coma de chausir se diguètz puslèu « chocolatine » o puslèu « pain au chocolat », et segur tot un ensems de biais de dire, qu’ajudaràn au chantier de geografia linguistica dau monde cercaire de l’Universitat.
Es possible d’i participar a d’enquistas sus un atlas dei biais de dire. E per sei promotors, se segur es un otís de recerca, aqueu permetrà deman de « sensibilisar lo grand public a la diversitat dau francés dins lei cinc partidas dau monde ». Un biais de pensar a l’opausat per exemple dei cronicas d’un jornau coma Le Figaro, que vòu dire au monde coma « parlar ben francés », escobant tota pratica nòva que fa lo dinamisme d’un idiòma.