Lou Pargue Naturau Regiounau a d'óujeitiéu nòu pèr 2015, uno annado que coumènço pèr la candidaturo recoumpensado au proujèt «Territoire à énergie positive pour une croissance verte» prepausa pèr lou Menistèri de l'Ecoulougìo.
Lou Pargue de Leberoun i participè emé soun proujèt intitula ''Luberon – Haute-Provence : pour un territoire de partage des énergies''.
«Avèn presenta un prougramo gloubau emé 36 milioun d'éuro d'investimen» esplico Jan-Louis Joseph, presidènt dóu Pargue.
E despièi lou 9 de febrié, lou Pargue es labelisa pèr lou Menistèri. «Acò permet d'avé de taus preferenciau, qu'uei es pas evidènt d'óutene de credit e investi dins li bastimen publi».
Lou Pargue s’endraio despièi «uno desenado» emé la voulounta de desvouloupa d'energìo verdo bord que se servis de centralo bioumasso e de caudiero à bos. «Devèn pas depensa mai d'energìo que ço que proudusèn» met en avans lou presidènt. «Sian li qu'an lou mai de caudiero au bos publico» s'enourguïs.
A cousta d'acò, 2015 debouco sus la creacioun d'un «caminet pèr persouno andicapado sus 1,2 quiloumètre emé de bos de cèdre loucau». L'escasènço, segoun lou presidènt, de permetre «i persouno qu'an pas acès a la naturo d'avé un acès touristi balisa».
«Un pargue proutegis, desvouloupo e coumunico»
Se trato d'un proujèt de 300 000 éurò que s'acabo en Mars. «Se travaio emé la marco tourisme e andicap» preciso Jan-Louis Joseph.
Puèi la plaço dóu velò dins lou Pargue pren mai d'impourtanço encaro : «anèn inaugura uno nouvello bouclo ''Pays d'Aigues à vélo''» dins un païs ounte d’àutri circuit eisiston. D'eitant mai qu'aquéu ciclo-tourisme a de pes dins lou Pargue : «en dès an, avèn 15 milioun d'éurò de retoumbado pèr lou velò” emé la despenso touristico, “contro 8 milioun d'investimen» coustato lou presidènt Joseph.
Lou Pargue dóu Leberoun vèi lou jour en 1977. «Aquéu territòri es forço viéu, pamens es un óutis mouderne» coumento Jan-Louis Joseph.
Pèr éu, «un pargue proutegis, desvouloupo e coumunico». Es sus aquelo idèio que se councéu lou Pargue Regiounau tau qu'es en Leberoun.
«Es un mediatour, uno asseguranço que se douno contro lis agressioun» apound lou presidènt.
Tambèn, l'envirounamen es un foundamentau que fai l'identita d'un Pargue Regiounau. Lou sendicat miste a dounc founda si cinq missioun iscricho dins lou code de l'envirounamen, que n'es lou pount d'intrado.
Es dins aquelo perspeitivo que lou Pargue fai de prevencioun sus l'ecounoumìo d'aigo. «Aquelo annado tres teinician coumpetènt van enfourma li couleitiveta, lis aubergaire, lis elegi, etc sus l'aigo» esplico Jan-Louis Joseph.
La lengo es dins la charto du Pargue
Mai tard, lou 4 de juiet, dins l'encastre dóu cicle ''Un samedi du Parc'', uno animacioun ''Aqui l'aigo es d'or'' (en prouvençau sus l'aficho) sara dins la countinuita dóu proujèt.
L'apelacioun prouvençalo dóu tèmo fai resson i pichòti mesuro facho a l'entour de la lengo nostro, includo dins lou patrimòni culturau dóu Pargue.
«I a sèt paragrafe dins la charto que parlon de la lengo» preciso Jan-Louis Joseph. «Sian gardian di tradicioun que creon de desvouloupamen» perseguis.
E lou Pargue fa saupre que soustendra la creacioun de veni d'un «óusservatòri de la lengo prouvençalo à Chivau-Blanc». Senso douna mai de precisioun.
Pourta pèr un couleitieu, aqueu proujè es counsidera per lis autris assouciacioun coumo uno pèço d'artiharié carivènto anti óucitanisto.