Lo 21 de mai de 2022 èra marcat sus mon agenda dempuèi un brave moment. Èra lo jorn de la primièra marcha de las fiertats a Rodés, organizada per l’associacion Alertes.
Dire aquela diversitat en occitan
Aviái pas jamai participat a una pride mas aquí, me diguèri que lo moment important èra vengut. M’i caliá èsser ! Per representar las nòstras diversitats e balhar de visibilitat a las personas LGBTQIA+ del campèstre. Enfin l’escasença de sortir mon drapèu a las colors de l’arcolan flocat de la crotz occitana ! E per que lo messatge siague encara mai clar, escriguèri de totas las colors sus un tròç de carton « Sèm rurals, sèm queer, e miladieu sèm aquí ! ».
Per dire al monde que nos semblan que sèm pas obligat de quitar lo campèstre per viure la nòstra vida. Cal sovent de coratge per demorar aquí coma sèm e se fotre de la maldisénça, mas sèm tant legitimas coma los autres ! E del mai serem visibles, del mai serà aisit de s’aimar a l’aire liure.
Per dire al monde del campèstre qu'existissèm. Sèm tanben aquí, a l'espeçariá, dins la sala de fèstas, o dins lo bòsc a cercar campairòls. E aquò es pas novèl, las nòstras mametas èran benlèu lesbianas, qual sap ?
Per dire al monde de las metropòlis que vivèm e aimam pas sonque en vila. Ma plaça es ont que se tròbe, e a ieu m’agrada melhor l’aire fresc, la verdura, e la tranquillitat de la campanha. Pòdi cultivar legums e tanben potonar ma copina, pòdi èsser filha de païsan e vegetariana, pòdi daissar mos pelses e me chimpar a la ribièira, pòdi demorar en Avairon e aver una vida sociala plan viva, pòdi èsser queer e parlar la lenga dels vièlhs del vilatge.
Soi fièra de portar aqueste messatge pendent la marcha de Rodés, e de lo portar dins la lenga nòstra en mai d’aquò. Un biais de dire que las nòstras realitats son pas incompatiblas amb l’identitat e la cultura occitana. Al contrari, se pòdon celebrar e revendicar d’un meteis vam ! Quilhada al cap d’un baston, la meuna pancarta destona al mièg dels nombroses messatges en anglés e en francés. Un fum de personas l’agachan, m’interpèlan e la prenon en fòto. Me pensi que se reconeisson...