La ciutat basca demanda un fonccionari territoriau per bailejar sa politica linguistica, “favorisant la transversalitat amé leis autrei direccions de la ciutat”, ce que laissa imaginar que la Vila vòu faire passar la lenga Euskara tant dins leis espacis vèrds coma dins la sinhaletica o la colecta dei residus.
Es pas la soleta en País Basc, bòrd que Sant Joan de Lutz demanda un tecnician desvolopaire de la lenga basca. Aqueu deurà faire de proposicions per definir una politica linguistica comunala, “crear una dinamica favorabla a la lenga basca au dintre de la Comuna e acompanhar lei personaus comunaus dins l’organisacion d’una oferta bilingua¨” e, entr’autres, assegurar de trabalhs de traduccions de documents municipaus.
A l’ora d’ara sortir d’un cursus bilingüe o en immersion a l’escòla pòu ajudar a trobar un emplec interessant en Euskadi Nòrd, bòrd que, alòr que s’endraïa lo movament dei collectivitats localas, trobam ja cinc pòstes dedicats au desvolopament de la lenga : fins qu’ara tres a Biarritz, un a Baiona e un a Endaia. En projecte ne’n recrutaràn adonc un autre a Sant-Joan de Lutz, e se tracha de’n crear encara tres a Urrugne, Ustaritz e Ciboure.