L'estage de Prouvençau Lengo Vivo: uno flamo que trantaio mai s'atudo pas

Pèr Mateo, 11 an, « es l'escasènço de faire de rescontre nouvèu, que i a de gènt que s'interèsson de mai en mai au prouvençau ». Vèn de passa quatre jour emé la lengo d’O dins la bouco e dins l’auriho.

Aquel estage annuau Prouvençau Lengo Vivo s'èro arresta en 2013 per manco de mejan. L'assouciacioun epounimo, que l'ourganisavo despièi 2001, aguè grand plasé de reprene soun ativeta principalo.
 
Se la campagno de proumoucioun 2016 coumençè un pau plan-planet, l'interès pèr la lengo s'es pas atuda . Un mouloun de jouine de 11 à 19 an a counfierma soun desi d'investimen dins lou mantèn dóu prouvençau. « Se prougressan mai lèu em'aquel estage, es coumo se jougavian en aprenènt, e ço toujour en prouvençau » coustato Lucas, 14 an, vengu de Digno (04). 

L'estage recampo d'adoulescènt de la regioun à l'entour d'un prougramo festiéu e ludi. « Es pas un estage de danso classico, mai un estage de prouvençau : adounc acò valié lou cop » coumparo Mateo.
 
Un estrambord que se tradus pèr la recerco de l'autre. Segoun Lucas, qu'aprèn tambèn lou japounés em'un courrespoundènt sus lou web, lou fa d'èstre « en chourmo , parla 'mé d'àutri gènt d'àutri vilo » a rèn de vèire 'mé lou prouvençau « aprés en classo, estilò en man ».
 
Aquelo quisto de duberturo, PLV i tèn forço. « Chasque an, counvidan un group que canto dins soun parla, e esclusivamen dins soun repertòri » esplico Paulin Reynard, presidènt de PLV.
 
Ana en dela de la grafìo e dóu parla loucau, acò's un óujeitiéu de l'assouciacioun dins l'elabouracioun de soun estage. E ço, dins lou soucit d'alterna li tèmo e renouvela lis animacioun, pèr lis estagiàri abituau. D'aiours, quàuquis un devènon, mai tard, éli-meme animatour au sèn de la Chourmo !

Dóu cousta di jouine, l'estage s'apound i cous dóu coulège, mai basto pas. Lucas, éu, penso que faudrié « d'ativeta de sourtido 'mé lou coulège, ounte se poudrié parla en prouvençau ».

Dins l'ideau, voudrié aplica lou councèt de PLV is animacioun escoulàri. D'eitant mai que « pas tout lou mounde pòu veni à l'estage durant li vacanço, e pas tout lou mounde parlo la lengo ».
 
Aquéli jouvènt, éli, soun counsciènt que vuei uno dinamico prouvençalo assouciativo s'embrounco à uno inmoubileta istituciounalo. L'enjò, pèr éli, es que lis iniciativo coumo aquésti poscon subre-viéure, bord que n'an besoun.
 
Uno capitado que fau rèndre mai impatanto encaro pèr que la lengo siegue ausido. Quouro la flamo fara lou fiò...